Dirixíu por Xune Elipe y con realización de Javi Lueje, el documental inclúi testimonios que falen de cómo surdió Conceyu Bable y les circunstancies nes que tuvo que desenvolver el so llabor, de cómo foron los primeros pasos de la normativización de la llingua asturiana y de cómo ven el futuru d'ella, ente otres cuestiones
30 abr 2024 . Actualizado a las 17:28 h.TPA estrena esti martes a les 22.30 hores el documental Conceyu Bable: entamar los llabores de la casa, producíu pola Conseyería de Cultura, Política Llingüística y Deporte y Goxe Producciones pola 45 Selmana de les Lletres Asturianes, dedicada a esta asociación que tuvo un importante papel na defensa de la llingua y la cultura d'Asturies na Transición.
Dirixíu por Xune Elipe y con realización de Javi Lueje, el documental inclúi los testimonios de Xosé Lluis García Arias, Lluis Xabel Álvarez, Xuan Xosé Sánchez Vicente, Pili Fidalgo, Miguel Solís Santos, Amelia Valcárcel, Vicente García Oliva y Ana Cano, que falen de cómo surdió Conceyu Bable y les circunstancies nes que tuvo que desenvolver el so llabor, de cómo foron los primeros pasos de la normativización de la llingua asturiana y de cómo ven el futuru d'ella, ente otres cuestiones.
La revista Asturias Semanal publicaba en xunu de 1974 una entrevista a trés mozos universitarios: Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d'atención a la sociedá contra'l complexu d'inferioridá rexonal y defendíen la llingua asturiana como un bien cultural, asina como la so presencia nos medios de comunicación y na escuela, y la creación d'una lliteratura y d'un públicu pa ella.
En payares de 1974 la mesma revista entamaba una sección baxo'l nome Conceyu Bable, de la que se responsabilizaba'l Grupu CB, primero quincenal y ensiguida selmanal, que se mantuvo hasta'l pieslle de la revista, en xunu de 1977. Neses páxines ta l'empiezu d'un llabor de dinamización social que foi más allá de la reivindicación llingüística, sirviendo como puntu d'inflexón al empiezu de la Transición.
L'autonomía y los símbolos que la identifiquen, como la bandera o l'himnu, les distintes facetes de la música asturiana: la gaita, l'asturianada, la canción d'autor, el deporte tradicional, el quesu o la sidra tuvieron na xente de Conceyu Bable los grandes impulsores; pero la so principal contribución foi llograr que se diera un pasu novedosu alredor de la llingua asturiana: de ser un atributu identitariu o un elementu patrimonial a conformar un valor absolutu capaz a xenerar una nueva identidá social. La campaña Bable nes escueles que promovió llevó esi lema hasta los últimos rincones d'Asturies.